Lohahevitra iray lehibe sy mafonja ao amin’ny Soratra Masina ny fahatahorana an’Andriamanitra. Antoky ny fandehanan’ny mpino Kristiana amin’ny finoana sy fiainany ao anaty fiadanana izany. Tsy afaka hanana fahatahorana an’Andriamanitra anefa ny mpino raha tsy fantany hoe iza moa io Andriamanitra izay inoany io. Ny tsy fahafantarana izany dia olana lehibe iray voalohany avy amin’ilay mpino satria tena maneho ny tenany eo amin’ny zava-boahary sy ao amin’ny Soratra Masina Andriamanitra (Rom. 1:20).
Fahatahorana amin'ny maha-olombelona
Ny olombelona rehetra izay mitafy nofo sy rà dia manana tahotra ara-boajanahary avokoa, izany hoe mandeha ho azy. Misy lafiny manokana izay tsara eo amin’ny fahavelomantsika (“survie”) izany. Hany ka ny olombelona rehetra dia manana izay zavatra atahorany avokoa. Mazava ho azy moa fa amin’ny maha-olombelona koa dia ny fahatahorana ny fahafatesana no fahatahorana ambony indrindra. Hany ka niezaka mafy ireo olona manam-pahefana sy fahaizana teo amin’ny tantara mba hiady amin’ny fahafatesana. Raha misy fomba ahazoana mametraka ny tena tsy ho levona aza dia nataony izany. Zavatra ratsy izay tsy tiana ary iadiana izany ny tahotra.
Fahatahorana araka ny Soratra Masina
Ny Baiboly no manazava fa ny fidiran’ny ota teto amin’izao tontolo izao no nidiran’ny tahotra ihany koa (Gen. 3:10). Niafina ilay Mpahary azy ny olombelona ary nifampatahotra. Niafara tamin’ny fifankahalana sy fifamonoana izany. Amin’ny maha-taranak’i Adama antsika olombelona dia manaraka antsika foana io tahotra izay nolovantsika taminy io. Ny tahotra no mibaiko ny hetsika ataontsika rehetra na dia tsy tonga saina amin’izany aza isika. Rehefa tonga olom-baovao ao amin’i Jesoa Kristy kosa ny olona (Jao. 1:12), dia mivadika tanteraka izany rehetra izany ka manjary fiadanana indray no misolo ilay tahotra. Izany indrindra no mahatonga an’i Jesoa miteny miverimberina ao amin’ny Filazantsara manao hoe “Aza matahotra”, “Ny fiadanako no omeko anareo”, sns… Tena sarobidy izany.
Ny fahatahoran'i Sifra sy Poa
Rehefa manohy mamaky ny Soratra Masina ihany ka tonga ao amin’ny tantaran’ny Zanak’Israely tany Egypta, dia misy trangan-javatra tsy mahazatra. Tantara kely iray izay nanova ny tantaran’izao tontolo izao. Nisy mpampivelona Hebreo roa vavy natahotra an’Andriamanitra ka sahy naninana an’i Farao (Eks. 1:15-21). Voalaza fa “natahotra an’Andriamanitra” izy ireo ka tsy namono ny zazalahy Hebreo araka izay nandidian’i Farao azy. Nahalala izy ireo fa ilay Andriamanitra izay nahary ny zava-boahary sy ny olombelona no manana fahefana ambony indrindra, ary mbola hitsara ny natao rehetra. Tsy nandeha ho azy izany fahatahoran’izy ireo an’Andriamanitra izany, hany ka novalian’i Jehovah soa izy ireo. Mahavariana io tantaran’i Mosesy zaza io.
Iza no tokony atahorantsika?
Tsy herin-tsaina ny fahatahorana an’Andriamanitra fa fahatokiana ny zavatra tsy hita. Izany hoe finoana marina miorina amin’ilay Zanak’Andriamanitra dia i Jesoa Kristy. Tsy afaka hatahotra an’Andriamanitra mihitsy izaho sy ianao raha tsy manana fifandraisana akaiky sy feno amin’i Kristy ilay Adama faharoa na Adama farany (1 Kor. 15:45-49). Rehefa ao amin’i Kristy isika dia misolo fahatahorana an’Andriamanitra ilay fahatahorana nateraky ny ota. Noho izany, raha mbola olona na zavatra no itoeran’ny fahatahoranao, dia tsy manana fahatahorana an’Andriamanitra ianao (Asa 5:29). Menatra an’i Kristy ianao, ka ho menatra anao koa izy amin’ny andro farany.
Fahatahorana an'Andriamanitra iainana isan'andro
Tsy mora ary tsy tonga ho azy ny fananana fahatahorana an’Andriamanitra (Oha. 9:10), kanefa dia izany no abidim-piainana sy fitondran-tena ao amin’ny fanjakan’Andriamanitra. Mila ampiharina isan’andro ny teny fahalalana ny amin’Andriamanitra sy Jesoa Kristy fa tsy atao ho fahalalana mijanona ao an-tsaina fotsiny. Afaka mampiasa ary te-hampiasa ahy sy anao hanova ny tantara Andriamanitra raha mety hanana fahatahorana Azy isika ka handà izay tsy avy aminy na dia ny fahefana ambony indrindra eo amin’ny olombelona sy ny fiarahamonina aza. Mba saintsaino anie hoe iza no atahoranao mihoatra noho Andriamanitra e? Manosika anao hanakaiky an’i Jesoa ve izany sa hanalavitra Azy? Hoy ny 2 Timoty 1:7:
Fa tsy nomen’Andriamanitra fanahy osa isika, fa fanahy mahery sy fitiavana ary fahononan-tena.
Jesoa rehefa teto amin’izao tontolo izao dia tsy natahotra mihitsy na dia nifanehatra tamin’ireo mpitondra fivavahana aza. Ny mpianany indraindray no natahotra sy nanahy tamin’ny zavatra nolazain’i Jesoa ireo mpitarika ny Israely. Satria Jesoa ilay Fitiavana Tanteraka. Izay tena tia tsy matahotra ary efa afaka tamin’ny fangejan’ny tahotra rahateo (1 Jao. 4:18). Ny fanafodin’ny fahatahorana an’izao tontolo izao dia ny fitomboana amin’ny fitiavana sy fahatahorana an’Andriamanitra ao amin’i Jesoa Kristy.
