Fanontaniana manitikitika ny maro matetika ny hoe: “inona moa no antsoina hoe fiangonana?”. Heno amin’ny olona maro amin’ny toerana samihafa ihany koa ilay fomba fiteny hoe: “firenena kristiana”. Dia lasa ny saina rehefa mandinika ny Soratra Masina sy mahita ny zava-misy eny anivon’ny fiarahamonina. Inona ary izany no mamaritra ny maha-kristiana? Rehefa ambony ve ny tahan’ny fijoroan’ny trano fiangonana amin’ny fiarahamonina na firenena iray dia azo lazaina fa kristiana izany fiarahamonina na firenena izany? Ary inona no anjara toeran’ny fiangonana eo amin’ny fiarahamonina na firenena misy azy?
Fiangonana eo anivon'ny fiarahamonina
Raha eto Madagasikara manokana no jerena dia misy faritra maro izay ahitana fiangonana iray na vitsivitsy isaky ny vohitra. Misy amin’ireny trano fiangonana ireny no efa niorina mihoatra ny zato taona ka manana tantara manana ny maha-izy azy eo amin’ny fiainan’ilay fiarahamonina. Ny fanontaniana mipetraka dia hoe: nanana akony teo amin’ny fiarahamonina sy ireo mponina ao aminy ve ireny fiangonana ireny tao anatin’izany fotoana lava nijoroany izany? Raha lazaina amin’ny fomba mahazatra kokoa amin’izao vanim-potoana izao dia hoe: nahavita ny iraka (mission) nampanaovina azy ve ny fiangonana?
Ny "Fiangonana" sy ny "fiangonana"
Ny olona kristiana izay mahalala ny fampianarana fototry ny Soratra Masina (Baiboly) dia mahafantatra mazava fa ny fiangonana (assemblée) dia tsy ilay trano akory, na dia endrika iray isehoany ho vavolombelo eo anivon’ny fiarahamonina aza izany. Ny famaritana tsotra dia hoe: ny fiangonana dia vondron’ireo mpino an’i Jesoa Kristy miombona amin’ny finoana fototra iray araka ny Soratra Masina sy miaraka manompo an’Andriamanitra eo anivon’izany fiangonana izany sy ny fiarahamonina manodidina. Noho izany, raha mamaky izay voalazan’ny Baiboly isika dia misy andinin-tSoratra Masina vitsivitsy milaza mazava ny antom-pisian’ny fiangonana sy ny iraka nomen’i Jesoa Kristy azy. Ny voalohany mahazatra amin’izany dia ny Matio 28:18-20. Misy lafiny vitsivitsy tokony ho fantatra ao amin’io fanambaran’i Jesoa ao amin’ny Matio 28 io.
Voalohany indrindra, Jesoa Kristy no lohan’ny Fiangonana — marihina eto fa tsara ny manavaka ny “fiangonana” izay vondron’ireo mpino amin’ny toerana iray sy ny “Fiangonana” izay tenan’i Kristy manerana izao tontolo izao (église universelle). Ny Fiangonana dia ireo olom-boavonjy marina satria efa voasoratra any an-danitra ny anaran’izy ireo. Tsy izay rehetra mivondrona na mambra ny fiangonana akory dia ao anatin’ny Fiangonana daholo fa misy ary maro ireo izay tafiditra eo anivon’ny fiangonana iray kanefa tsy mpino satria mbola tsy niova fo na fantatra amin’ilay ilazan’ny Soratra Masina azy hoe “nateraka indray”. Maro no mamita-tena na voafitaka ny amin’izany endrika finoana diso izany (Mat. 7:21-23). Jesoa no lohan’ny Fiangonana satria Izy no nomen’Andriamanitra Ray ny fahefana feno.
Iraka hanao mpianatra
Faharoa, maniraka ny Fiangonana i Jesoa Kristy “hanao mpianatra” ny firenena rehetra. Mila azavaina tsara amin’ny fiangonana fa “iraka” io, izany hoe baiko ary i Jesoa ilay lohan’ny Fiangonana no nanome izany, dia Izy ilay antsoina hoe Tompo. Noho izany tahaka ireo apostoly, ny mpino na kristiana marina tokoa dia mandray am-pifaliana sy mandeha manatanteraka izany baikon’ny Tompo izay antsoina amin’ny teny mahazatra hoe “Iraka Lehibe” izany. Tsy manangana trano fiangonana akory no atao amin’izany fa “manao mpianatra” ho vondron’ny mpino eo anivon’ny fiangonana. Ny manao mpianatra dia mitory ny asam-pamonjena lehibe izay nataon’i Jesoa amin’ireo izay tsy mahalala sy tsy mbola nandre izany, ary mitaona sy mitarika azy ireo hino sy hanahaka Azy ka ho tonga mpitory ihany koa.
Fahatelo, maro ireo milaza fa mino ary ny endrika fianoana dia mety ho samy manana izay andraisany azy. Misy aza moa no milaza fa samy manana ny finoany ny kristiana fa làlana iray ihany no arahany ary samy mandova ny fiainana mandrankizay daholo. Tsy marina izany ary fandriky ny devoly izay “mpandainga” sady “rain’ny lainga” hoy ny Soratra Masina. Ny finoana marina dia mifantoka amin’ny famonjena nataon’i Jesoa Kristy irery ihany fa tsy izay mety ho zavatra ety ivelany na endrika hita maso. Ny finoana marina dia ambaran’ny Soratra Masina fa avy amin’Andriamanitra sady fanomezan’Andriamanitra ka manova izay mandray sy miazona azy. Ny batisa no marik’izany finoana mahavonjy izany. Matetika anefa dia ampifamadihan’ny olona izany ka mihevitra izy fa rehefa atao batisa dia lasa mino, fa ny marina dia izay ambaran’ny Soratra Masina ihany hoe: izay mino no atao batisa satria io no marika hita mason’ilay famonjena nomen’Andriamanitra tsy hita maso. Ny batisa izany dia fanehoana sy fijoroana vavolombelona amin’ny fibebahana. Izay rehetra tsy mbola nandalo fibebahana dia tsy mandova ny fiainana mandrankizay. Izay rehetra efa nibebaka marina dia mahafantatra izany (conscient) satria manana ny Fanahy Masina ho vavolombelon’izany izy.
Manahaka an'i Jesoa Kristy
Fahefatra, ny Fiangonana ihany koa dia manabe ireo mpino ao anaty fiangonana hiova amin’ny fanahafana an’i Jesoa Kristy. Mampalahelo fa marobe ireo kristiana ankehitriny no zara raha manana fahalalana ny Sotratra Masina satria tsy misy mampianatra azy ireny. Maro koa ireo izay miaina fiainana tsy mifanaraka amin’ny sitrapon’Andriamanitra satria tsy misy mamahana azy ireny amin’ny Tenin’Andriamanitra sy mikolokolo ny fiainam-panahiny. Noho izany, asa goavana no nanirahana ny Fiangonana fa tsy mora kanefa Jesoa Tompo dia nanome toky fa homba an’izay mankatoa sy manatanteraka izany baikony izany.
Farany, fiainana iray manontolo ary isan’andro ny fanarahana an’i Jesoa sy ny fanompoana Azy amin’ny iraka nampanaoviny fa tsy hetsika miserana etsy sy eroa. Izay an’i Kristy marina dia voamarik’izany ny fiainany “isan-andro” ary mitombo tsikelikely amin’ny fanahafana an’i Jesoa izy, izany hoe mihamasina eo amin’ny lafim-piainany rehetra. Noho izany, na dia eo anivon’ny fiangonana aza dia mila manao izany iraka izany izay efa voavonjy satria mbola maro no napetraka na misora-tena ho kristiana kanefa ny làlany mankany amin’ny fahaverezana mandrankizay (Mat. 7:13-14). Anisan’ny Fiangonana ve ianao sa mbola mitoetra ao am-piangonana fotsiny ihany? Ny finoana an’i Jesoa Kristy sy fibebahana ary fanarahana Azy sy fanompoana amin’ny fanetren-tena sy fandavan-tena (làlana hety) irery ihany no antoka handovanao ny fiainana mandrankizay.
