Maro amin’ny mpino Kristiana no mampiasa ireny tetikandro famakiana Baiboly ireny, izay vokarin’ireo fikambanana samihafa. Tena tsara tokoa ny manana planina na drafitra enti-mamaky ny Soratra Masina satria mila mametraka tanjona amin’izany isika. Tsara ho fantatra anefa fa misy karazany maro ny tetikandro famakiana Baiboly ka tsara ihany koa ny mamantatra izany araka ny soa azo avy aminy.
Ny famakiana sy fianarana ny Soratra Masina ho an’ny Kristiana dia tsy haitraitra sanatria fa tena tsy maintsy ifotorana sy anokanana fotoana isan’andro. Jesoa no milaza araka izany fa ilain’ny fanahintsika izany mba ho sakafom-panahy, ary tsy ho diso hanina sahaza azy ny fanahintsika. Matetika anefa dia ny sakafo ho an’ny vatantsika (izay zavatra rehetra ilainy) no tena imasoantsika fa atao ambanin-javatra ny ara-panahy. Nahoana re? Satria ve tsy misy vokany mibaribary eo no ho eo na afaka andro vitsivitsy sns..? Ny marina dia tsy maintsy misy fiantraikany amin’ny vatana ny tsy fahampiana na tsy fahalavorarian’ny sakafo omena azy. Tahaka izany koa ny fanahy raha tsy mahazo sakafo amin’ny fotoana ilany azy (Mat. 4:4).
Antony ilana ny tetikandro
Voalohany indrindra, ilaina dia ilaina tokoa ny mametraka drafi-pandaminana eo amin’ny famakiana Baiboly satria manamora ny fanatrarana tanjona izany. Raha tetikandro herintaona ohatra no arahinao dia mazava kokoa ny fomba anatanterahanao izany.
Manaraka izany, mitohy ara-potoana ny famakianao Baiboly ka mirafitra tsara koa ny fahatakaranao izay ambarany. Ny tetikandro famakiana Soratra Masina dia natao ho mati-paika ary tena mahomby amin’izany fa tsy natao fahatany akory.
Ary satria moa boky lehibe — izany hoe boky maromaro mitambatra — ny Baiboly dia tsy vita vetivety ny famakiana azy ka mila tari-dàlana sy sori-dàlana mba hahatongavana amin’ny tanjona dia ny hahavita ilay famakiana ny Baiboly manontolo.
Ny Tenin’Andriamanitra ihany koa dia sarotra vakiana amin’izao, ary izay no anisan’ny antony voalohany tsy haharetan’ny olona maro rehefa mamaky ny Baiboly. Tahaka ny piozila (“puzzle”) iray goavana be izy io ka tsy ho azonao mihitsy ny hafatra samihafa ambaran’Andriamanitra ao raha tsy atambatrao ireo singa madinika maro ka miha-mahita ilay kisary lehibe ianao. Miha-mirafitra sy mitombo noho izany avy eo ny fahalalanao sy ny finoanao.
Na dia tsy mahazatra ny maro aza ny mampiasa ireo tetikandro famakiana Baiboly samihafa, dia tsy sarotra velively, fa mila fahalinana sy fifantohana, ary fikirizana ny fanarahana azy. Dia aoka tsy ho kivy eny an-dàlam-pamakiana Baiboly eny raha sendra misy tsy araka fa tohizo hatrany. Ilay mahavita vaky ny Baiboly hatramin’ny faran’ilay tetikandro no tena zava-dehibe fa tsy ny fotoana hamitana azy loatra tsy akory. Rehefa zatra ianao dia miha-mora kokoa izany.
Ireo karazana tetikandro famakiana
Misy maromaro ireo tetikandro na drafi-pamakiana Baiboly. Samy manana ny tanjona kendreny izy ireny, ka miankina amin’izay ilainao no hisafidiananao izany. Anisan’ny tsotra sy mora arahina amin’izany ny famakiana misesy ny Baiboly manomboka any amin’ny voalohany (Gen. 1:1) hatramin’ny farany (Apo. 22:21). Ho an’ny efa zatra mamaky dia tsy mila drafitra mazava akory io satria tonga dia miezaka mamaky isaky ny boky ao amin’ny Baiboly fotsiny mandra-pahatapiny. Fa ho an’ny olona sasany kosa dia tsara foana ny manana tetikandro mba hanampy satria mety ho fotoana voafetra ihany no ahafahana mamaky milamina isan’andro.
Raha ny fotoana famitana ny famakiana Baiboly no jerena amin’ireny tetikandro ireny, dia misy isan-karazany. Herintaona ohatra no tena tanjona apetraky ny maro, saingy misy koa ireo taona vitsivitsy na amam-bolana koa aza. Arakaraka ny fotoana atokana amin’ny famakiana isan’andro moa no mahatonga izany, ary saika isan’andro avokoa ny famakiana fa tsy misy mielanelana, araka ilay efa nambara tetsy ambony fa ilain’ny fanahintsika ny misakafo isan’andro.
Ireto ary misy karazana tetikandro vitsivitsy azonao iaingana:
- Tetikandro manaraka ny filahatr’ireo boky ao amin’ny Baiboly, izay mandrisika hamaky ny Baiboly hatramin’ny farany ao anatin’ny fotoana iray voafetra;
- Tetikandro misy famakiana Testamenta Taloha sy Salamo, izay ahafahanao mahita ny boky tantara ohatra sy ireo Salamo fiderana sy fisaorana maro isaky ny mamaky;
- Tetikandro misy famakiana Testamenta Taloha sy Salamo, miampy Filazantsara, izay manampy hahafantatra ny tantara ao amin’ny Testamenta Taloha sy ireo Salamo ary ireo Filazantsara efatra mitantara ny amin’i Jesoa Kristy;
- Tetikandro manaraka ireo olo-malazan’ny finoana ao amin’ny Baiboly, ohatra i Abrahama, Isaka, Jakoba, Mosesy, Josoa, Samoela, Davida, Elia, Elisa, Paoly sy ireo Apostoly…;
- Tetikandro manaraka lohahevi-dehibe iray na vitsivitsy mahakasika ny finoana sy ny fampianarana Kristiana izay notsoahina avy ao amin’ny Baiboly;
- Tetikandro manaraka ny fizotran’ny fotoana nitrangan’ny tantara na nanoratana ireo boky ao amin’ny Baiboly, ahafahanao mamaky sy mahita amin’ny fomba vaovao ihany koa ireo boky sy ny asan’Andriamanitra ary ny fivoaran’ny planiny voarakitra ao amin’ny Baiboly.
Tena ilaina mihitsy io famakiana ny Baiboly misesy io, ary raha mbola tsy namaky ilay araka ny fizotran’ny fotoana ianao dia tokony hanao izany fa mampitombo be dia be ny fahalalanao sy fijerinao an’Andriamanitra izany. Hahita kokoa ilay kisary lehibe ny amin’ny Soratra Masina ianao, ka hahatakatra misimisy kokoa ny toeran’ireo singa samihafa ao amin’ny Baiboly. Tsy azo hamaivanina mihitsy io famakiana Baiboly io raha te hitombo amin’ny fahalalana ny Tenin’Andriamanitra sy hahay handika izany ianao.
Mba ho fanampiana anao dia misy tetikandro manaraka ny fotoana (“chronologique”) omenay eto azonao alaina (“télécharger”) amin’ity rohy ity:
Misy loharanom-pahalalana samihafa azonao arahina koa amin’ity rohy amin’ny tranonkalan’ny Bible.com ity:
Raha misy fahalalana ambony indrindra tokony ho rantovin’ny mpino Kristiana mandritra ny fiainany rehetra, dia ny Baiboly na Soratra Masina no loha-laharana amin’izany. Andeha tsy hatao ambanin-javatra izany fa miankina amin’izany ny fiainantsika ankehitriny sy ho avy ary mandrankizay (Oha. 19:2). Aza misalasala miserasera aminay raha manana fanontaniana na mila fanampiana ianao! Jesoa Kristy Tompo, ilay Teny tonga nofo, anie homba anao ary ny Fanahy Masina hitari-dàlana anao amin’ny famakiana ny Tenin’Andrimanitra.
